「Lunch Time 就去滾！」@牛陣（H8尖沙咀）

天氣一開始轉涼，我地蝗蟲部隊第一時間就出動!
今次任務叫「Lunch Time 就去滾！」

咁激，真係未食都開心！

還是頭一次食牛陣，呢間係尖沙咀厚福街H8新分店，
聽同事話幾抵食，就快快試下有幾抵~

午餐有分放題或套餐，我地六位蝗蟲部隊全部叫$68套餐，
每人一碟牛及任食配菜，湯底選了sukiyaki 甜鼓油~

多款湯底選擇，價錢由$58-$218不等

配菜Bar 就在餐廳的中心，配菜款式還算多也很新鮮！

其實食呢Ｄ日式火鍋，配菜新鮮與否實在很重要，
夠新鮮，只需簡單的sukiyaki湯底便能帶出食物本身的味道！

除了蔬菜，也有芝士腸，龍脷柳及魚蛋。
芝士腸係真係有芝士！魚蛋也夠爽口，龍利柳就無味~

菇類有多款，都幾新鮮~

話口未完Ｄ牛都到齊，平時我地班蝗蟲去到邊嘈到邊，
但個爐一滾，一個二個靜晒密密食，呢一個moment 真係好好笑！

食sukiyaki必需要食日本蛋，因為日本蛋味夠香濃，

配上日本蛋的牛肉有起死回生的作用
不過Ｄ牛真係無牛味
可幸是我地主攻配菜，還有以下必食item....

就係呢個任食 Häagen-Dazs 優惠!!!
聽人講唔係間間有架!!!

有四款口味任食：芒果、朱古力、曲奇忌廉及士多啤梨

呢個係我第一杯，之後還食多一球士多啤梨，真係好好味!!

最後蝗蟲部隊平均食左5球雪糕，連加一每人$83，
係就係貴左少少，而且論質數都只是合格OK類~

但原來「lunch就去滾」呢個活動真係令人好興奮！
食完個個都心滿意足咁離開，

此刻，無價!! : )

Tortilla de Patatas 西班牙蛋餅

從西國回來剛好一個月了，其實係果邊食過o既野，
只有兩樣係令我難忘：

第一當然係 Iberico de Bellota Jamon ，
另一個就係今日介紹o既西班牙蛋餅!

記得最後一天在Barcelona 寄了名信片回家，
說回家後要親手做這個蛋餅比屋企人食！

然後回港數天，老爸即問我："又話整咩餅我地食？"
一直到今日我先決心整，係因為要做呢個蛋餅，
必須有一個易潔PAN，剛巧家中正缺這PAN，

昨日經過吉之島便買左個，然後上網搵食譜...
從來只識煮公仔麵，最多再加溏心蛋o既我，
今次真係膽粗粗跟住個網上食譜照住做!!!

http://mypaper.pchome.com.tw/rachel_liu/post/1320305998

係呀，就係呢個web~ 90%跟足來做架！
其實真係唔難做，以下分享下我o既做法過程：

材料：
1.中型馬鈴薯兩三顆
2.蛋4至5隻
3.洋蔥半個
4.少許雞粉
5.橄欖油　

Step 1

馬鈴薯切片，用水先煮半熟，此乃慳時間之舉!
落多Ｄ橄欖油，炒香已切粒的洋蔥及馬鈴薯備用

 Step 2

可自行加煙肉或其它配料，都係炒香佢，
然後再與已炒香既洋蔥及馬鈴薯攪勻
呢個時候Ｄ馬鈴薯有Ｄ散，但問題不大，
咁樣返而係剛剛好可hold 住成個蛋餅

Step3

打蛋，再倒入所有已半涼的材料,
加少許雞粉（我自行再加Ｄ黑胡椒）再攪勻佢！

Step 4

起火落少許橄欖油燒紅個PAN，轉細火後倒入攪勻了的材料，
煮6-10分鐘，煎到周圍蛋皮都已經脫離鍋邊（我就煮左7-8分鐘）
然後用一個碟輔助把蛋倒轉，再放回PAN 中煎多2分鐘~
呢個step 差Ｄ衰左，記住動作要快，
可再參考網上食譜!!!

上碟灑香草完成! 影返張靚仔相先!!!

其實真係好易，又好味，如果成功，
切開幾份，用手拿起基本上係不會散開，

連我呢個煮食白痴都做到，
仲等？ 今晚就試做啦，哈哈~

Stone Grill @ T.S.T

好多時候，約朋友食餐飯，可以係一個好機會去認識對方，
今次又因為一個食字，同剛相識o既友人第一次食lunch，

仲要係去食貴野 - Stone Grill @ 尖沙咀赫德道
無錯，海運果間已搬左黎呢度，地方細左，成個感覺無以前咁「Grand」
























又來看看Menu~ Lunch Set 由$90-228不等，
當中更有二選 / 三選材料套餐，分別係$168及$198
最後我要左三選：大磨菇＋牛肩扒＋羊架

食左餐包，飲左餐湯，好快就送上主菜~

石燒動作要夠快，重點係先將兩面燒熟來鎖住肉汁。
然後即拿起放係碟上等一等，或切作一塊塊再邊食邊燒，
咁樣就唔會有燒過頭o既結局...
 
特別係呢Ｄ平餐，預左唔會比A級靚牛你燒，
就更加要小心相處理！ 

其實一邊食一邊燒又同友人傾計，真係好忙亂！
所以只係影左兩張，如果再食就一定唔會係返工o既lunch hr lu~  

牛肩肉口感不錯，牛味足，但沒有太大驚喜~

友人叫左$228 o既 牛柳餐，試左少少真係好淋肉味香濃!　

最後餐飲咖啡作結，雖然只係一個小時的短聚，
卻算係好滿意o既一餐，因為與友人G 傾o左好多生活上o既野，
更發現大家都是愛吃之人~ 同類團聚，太高興了！

能夠與不同o既人結交，認識，分享快樂，互相支持，
快樂人生，咪就係咁簡單囉~ !

蝗虫Team試食＠千福大少

我有幾為食大家都知，但其實我身邊o既朋友都一樣咁為食！
怎至係公司，我地Dept,  若同另一Dept 出去食野，
事後都對我地o既食量無不感到驚訝，有「蝗虫之美譽」~

今次「蝗虫部」又出動，目標就係呢間東南亞菜的千福大少。



千福大少位於麼地道，麗景酒店旁地點不算難搵。

餐廳分兩邊，近大街那邊係飲野為主，另一邊係用餐為主，
裝修都幾別緻，燈光色調偏暗。

Menu 設計好DIY簡樸，可選擇o既項目都唔多，
此店推介o既係「大少海南雞飯」， 備有$68龍崗雞 及$88青遠雞之分，

我選了較平宜o既$68龍崗雞試一試，
「皇虫部隊」分別點了咖哩吉豬／炸魚烏冬及一個XO醬肥牛炒河。
























 




XO醬肥牛炒河先到，「皇虫MT」試食後話OK，
但其實咪即係乾炒牛河一碗?!

之後就係我叫o既$68「大少海南龍崗雞飯」

埋相都幾別緻，特別係用左小茶壺來放清湯，
有保溫作用，可惜清湯清而無味；

海南雞夠香，但不是鮮雞的香味，相信係用特製湯煮成，
肉嫩卻不滑，可能係平宜o既差別，還可接受。

醬有三類，分別是酸辣汁，豆辦醬及黑甜醬，
三款醬都沒有大驚喜，都係一句：OK 啦!

油飯還算香，但有Ｄ硬，配菜係最hea，不難吃但無特別。

海南雞夠香，但不是鮮雞的香味，相信係用特製湯煮成，
肉嫩卻不滑

清湯清而無味

再來是咖哩吉豬／炸魚烏冬，
「皇虫部隊」試食後都是說：「OK/不錯/幾好」，
特別係個炸魚( 無影相) , 外脆內軟，魚肉好滑，

我無食到，所以都係得以上o既評語。

「OK/不錯/幾好」的咖哩吉豬烏冬

最後各人都叫左一杯Chocolate，只有泡沫有朱味，
再飲多兩口，就是自己沖既華田feel...又再失望。

其實有一班同事都喜歡食食食，
工作再辛苦，lunch 嘻嘻哈哈，感覺都不錯，

即使係呢Ｄ樣樣都只係OK Level既餐廳,
都一樣食得好開心。

當然，如果約友人傾計飲野，呢間都不錯，
但食飯嘛，相信有更好選擇。

最緊要食得開心＠味吉拉麵館 Mikichi （THE ONE 分店）

當人人都排隊等２個鐘來食一碗豚王／一風堂日式拉麵時，
有冇諗過要嚐到一餐味美的膳食，除了食物本身o既味道，
其用餐o既環境，侍應生是否服務周到，食具是否清潔便利...
呢一切絕對影響那送到你眼前o既食物，能否討你歡心。

很怕花時間去等那些只有很少食用時間o既所謂美食，
既然係美食，我認為更要花多一點時間去用心品嚐它，

今次要分享的，是一間質數OK o既拉麵店，
雖不及一眾日式拉麵咁好食，但正因人人都瘋湧往名店去，
完全無人留意到呢間由POKKA 集團經營o既﹣味吉拉麵館

連尖咀THE ONE 呢間，沙田禾輋村、旺角家樂坊、
九龍灣Megabox、將軍澳、新蒲崗及藍田一共有8間分店。

Happy Friday Night 7PM，店內只有小貓數隻，
環境乾淨企理，光暗適中，座位舒適寛落，
侍應生差不多是1:1地提供服務，十分有禮周到。

先看看MENU~







有各式拉麵如：豬骨、味噌、地獄、鹽味、牛骨湯底拉麵
也有烏冬及蕎麥麵，另外小食種類選擇也頗多，
燒雞翼、串燒牛脷、餃子、甜品...應有盡有，
實在很適合香港人呢個Market~

由於太多選擇，最後決定來兩碗最基本的豬骨湯底拉麵，
一碗選自家制叉燒併特式豬軟骨，另一碗是叉燒併厚切腩肉

落Order 時，侍應生會問你叉燒要瘦定半肥瘦，很貼心的服務~

豬骨湯自家制叉燒併特式豬軟骨底拉麵

兩碗麵約十分鐘後送上，侍應生細心推介加入蒜容會更香口，

湯底豬骨味香濃，有一點偏鹹，麵質是港式粗麵但夠彈牙
半肥瘦自家制叉燒，肥肉與瘦肉3:1, 肉質較淋幾香口，

豬軟骨夠軟夠入味，做得不錯，幾好食~
付有糖心蛋半隻夠嫩滑可口有蛋香，合格~

豬骨湯自家制叉燒併厚切腩肉拉麵

另一碗除了厚切腩肉及附上少許明太子，其他都一樣，
腩肉肥瘦適中，入口即溶，肉味香濃帶點甜，所以不覺膩
可是明太子並沒有令湯底有任何變化，或只有更咸..

用上之前同事比我o既$50 Coupon 好抵~ 

總括而言，以港式拉麵來作準是合格有餘，
而且食得開心係最緊要，食完慢慢傾計都得，服務依然殷勤！

希望以上一切能保持下去，相信才能在尖沙咀立足，

假若路經The One又不想花時間等位，
可一試這間味吉拉麵館呢!


尖沙咀彌敦道100號The ONE Aeon MaxValu Prime LG109號舖

阿芳餛飩

近期尖沙咀柯士甸路開左幾間新餐廳，

係美麗華工作o既我真係有食神!

今日lunch 就試左呢間﹣阿芳餛飩（尖沙咀分店)

其實都開左好幾個月, 而且係紅磡崇潔街o既主店早已好評如潮

招牌套餐共有11款，詳情如下圖，價錢合理~

先上同事套餐的拍青瓜，貌似用刀拍，分量不少~
汁料酸甜微辣，青瓜還算爽口，但有點暖，扣少少分。


 

是日試左最基本的招牌淨雙併 ﹣

即玉豆豬肉餛飩及紅洋蔥豬肉餃子各5隻

招牌淨雙併

湯底有蔥花與蝦仔皮，帶點麻油香，感覺很清新！

餛飩皮薄得餡色也透出來，大小適中易入口，

先試玉豆豬肉餛飩，平時食到既都係菜肉餛飩，
原來改用四季豆口感更一流，爽口又沒有清菜味，
再配上軟軟的鮮豬肉香，好味!

另一款是紅洋蔥豬肉餃子，咬落去洋蔥既鮮味已湧出
如果你不喜歡洋蔥可能會有點抗拒，
但個人很喜歡鮮洋蔥的香甜，配鮮豬肉，真係好合胃口！

很滿足的食到最後的一粒紅洋蔥豬肉餃子作結，

但竟然食到有一條很短的「橡根」...

...如果唔係咁，我會比很高的評價!

有機會可去一試~

並希望我只係special case 啦!!

Berliner German Bar and Restaurant

聽說奧海城三期新開左間唔錯o既德國菜餐廳，

剛好要約朋友食野，就打電話Book位。

Happy Friday 前一日Book 7PM, 店員話已經Full左，

失望之際，佢竟然話得番6:30PM,問我得唔得...

我心想:"早30分鐘就有位,咁有幾full 呢？" 然後就confirm了~

番查資料得知呢間餐廳係由Cafe Deco集團主理

(即Wildfire同一集團), 係西灣河都有一間，

奧海城三期呢一間就係新開o既分店, 

雖然算是旺角區，但地點有點偏僻, 

就在豪宅 Hermitage樓下，一向對德國菜無咩好感o既我,　

如非經友人介紹話好食, 實在未必會專程上門幫襯.

Berliner by Cafe Deco Group

友人未到齊，Happy hour 飲品有7折，
即叫左兩杯Cocktail 邊飲邊等, 不過飲品無咩特別，
反而對隨飲品送上o既杯墊很感興趣!!

 

先來個小食「煙三文魚配德國黑麥包」，

首先煙三文魚充滿魚脂油,
入口即嚐到好香o既三文魚鮮味，
配上質感豐富o既德國黑麥包,
加上少少紫洋蔥吊一吊三文魚o既鮮味，

食完第一句係：好掂！

伴碟還有小量青豆薯仔沙律, 又係天仙配,
青豆原來同薯仔可以咁夾的!
humhum...很好o既Starter!

「煙三文魚配德國黑麥包」 ($78)

朋友快到達，便Order 了此餐廳精選o既Sausage Platter

一上桌已經傳來燒香腸o既香味, 共有：

Bratwurst德國香腸, 肉味重的Regensburger, 

Nurnberger紐倫堡腸及White Munich慕尼黑白肉腸

邊款好食？其實我真係唔太識分,
不過每一款都皮脆肉汁香，

再連伴碟o既酸菜絲同烤薯仔一齊食, 

真係不知不覺就食晒! 

Sausage Platter ($179)

食完Sausage Platter朋友又到齊，

就Order德國菜必食o既Roasted Pork Knuckle

原隻上已非常興奮, 份量十足！！

請Waiter 幫我地切開 - 「咔嚓」一聲，香味隨煙飄來~

個皮真係又脆又香, 鹹味平均, 內裡肉質半肥半瘦肉味濃，

一啖脆皮一啖肉, 口感雙重嚮受!

食到有點膩又可以食少少伴碟酸菜絲，
又係另一番法滋味~ 還有薯蓉都好滑, 好味!

Roasted Pork Knuckle($169)

呢餐足足由6:30PM 食到10PM,
侍應生o既態度都keep住有禮,服務也周到，
還見到另一桌有人慶生, 侍應及經理一齊唱生日歌很開心!

呢度地點係就係偏僻Ｄ, 不過呢餐之後，

已經諗緊幾時帶家人朋友再黎幫襯多次啦!

地址：大角咀海庭道18號奧海城三期地下G18號舖 

丼丼屋 Dondonya

上星期突然想食刺身！
友人都推介Doraya的藍鰭吞拿魚,

但好多人都唔知，其實藍鰭吞拿魚因為被大量捕殺，
數量已不多, 而且更有絕種o既可能！

再好食都唔想自己成為別生物絕種凶手之一，
所以從來都唔食註明係瀕臨絕種o既食品。

如對相關資料有與趣, 可到以下網址參考：

http://apps.wwf.org.hk/seafood/chi/bluefintuna/

其實不一定要珍貴先係最好，
想食刺身, 又唔想太貴, 可試位於Elements o既丼丼屋，
佢係美心集團其下o既一間高級日式丼飯店,
主要以丼(日式碗飯)及斧飯作賣點，
其刺身質數, 以其價格來說, 係不錯o既選擇。

另有兩間叫丼丼屋食堂 Dondonya Shokudo，
係旺角及屯門有分店, 價錢比較平宜。

吞拿魚三味丼

今次試o左店內皇牌推介o既「吞拿魚三味丼」，
其三味分別是赤身, 中Toro及大Toro, 賣相吸引, 份量適中，

眼見顏色鮮明亮澤o既吞拿魚, 未食都己經流口水！　

由赤身開始品嚐: 魚味濃, 沒有筋﹣合格!  

然後係鮮味十足o既中Toro,
其質感比大Toro 來得實在爽口,
吞拿魚味又夠鮮﹣讚！

最後係大Toro, 入口即溶並瞬間充滿了魚脂油香，
而且一Ｄ都唔覺得膩, 雖不及在日本漁市場質數，
但係香港以幾百蚊就食到呢個質數, 已經係大滿足了~ 正!

另外, 佢地採用既日本新瀉縣產秋田小町珍珠米都好好食，

一口魚脂香, 再一口有嚼勁o既米香,
呢個感覺實在太幸福了!

朋友叫左千層炸豬排定食，
由於我被這「吞拿魚三味丼」深深吸引左，
再加上友人話個千層炸豬唔好食，
完全無意識要影相~ 不提也罷!

炸蠔

另外都叫o左炸蠔試一試，上台夠熱，炸粉不算厚、
可惜蠔細不夠肥美，味道還OK,　

沒有太大期望所以都沒有失望，

總括o黎講, 呢度都係食番刺身好Ｄ!! ^^