大閘蟹的快樂時光@江記

足足有兩年無食大閘蟹，所以今年特別想食，

所謂少食多滋味，而且大閘蟹始終都係高膽固醇，
一人兩隻五至六兩重已經好夠食!

感謝友人G幫助下特價買入江記大閘蟹！
然後安排星期六的中午時間在家開餐!!
與家人一同慢慢品嚐，一樂也！

今次第一次自己煮，雖然無咩技巧，但都有點緊張！


一打開，蟹膏已流出，太期待了!

蟹蓋o既膏多到呢!!! 太正了~~

最後連腳肉都拆晒，放在蟹蓋沾上餘下的蟹膏油一同進食...
只有四字形容：「人間極品！」

媽媽及細佬食得好開心很滿足，我都覺得兩隻剛剛好!
突然想起曾經有人問，大閘蟹有咩咁好食呢？

其實問心真係無咩好食，不過大家有沒有發現，
為了食大閘蟹，總會因而相約好友或家人共享？

或者，除了那令人心動的蟹膏外，
吸引人的，就是一班人嘻嘻哈哈，
齊齊食大閘蟹的快樂時光吧! : )

Casablanca Oyster Steak Restaurant

雖然尖沙咀餐廳眾多，但想搵一間又抵食，環境舒適，服務周到的也不易。

可能真係好怕等位同人迫，比起那些人氣食府，
我更喜愛發掘一些未為人知的優質餐館，

今次就比我搵到呢間位於尖沙咀寶勒巷的Casablanca
此餐廳以電影「北非諜影」為主題，
內裡滿是Humphrey Bogart 及 Ingrid Bergman在電影裡的劇照及Poster.

平日Lunch Time 時間只有兩三枱客，實在冷清，
看看午餐牌共六款供選擇，價錢由$55的意大利飯或長通粉，
至最貴的扒餐也只是$75，價錢已包餐湯、沙律和餐飲，免加一。　

很快同事們都選定了，侍應生服務周到，落order 至上菜也不用久等!
先來一客很普通的什果沙律，材料算新鮮，是合格之作。

接著來的是日薯仔蓉餐湯及餐飽
餐飽是熱的，外脆內軟，薯仔蓉湯夠蓉又夠薯香味，很好!

然後就是主菜「紐西蘭西冷扒配紅酒汁」﹣
同事的燒至6成，我這份西冷扒卻燒至８成熟，
有點過熟了，雖不是貴價貨，但肉質鬆軟有口感，
牛味適中，配上紅酒汁更香口。

而配菜的蕃茄、烤薯仔和南瓜，都是美味佳作，份量剛好。

另外還有同事的香草汁長通粉，賣相吸引，
通粉口感軟硬適中，好香橄欖油味~

最後是南瓜汁意大利飯，飯夠硬身，甜甜的南汁也很開胃，
賣相也很讚，唯是味道淡口了一點，自行加一點鹽便剛剛好！

最後餐飲以一般水準作結，免加一每人都是平均$65,
離開時看到有「蠔一餐」$138 六隻生蠔promotion,
老闆在門口一邊送客一邊笑著推介午餐也可響用，
我們也笑說下次來個「Lunch Time 就蠔食」，正呀!

聽說此餐廳晚上會有Live Band唱一些老歌，
氣氛有夠浪漫，有機會可與情人試試晚餐也不錯！
如此有誠意的餐廳，真希望可保持水準長做下去...

最後送上 Casablanca 電影的主題曲，
幻想在醉人旋律下快樂地用餐，相信會是另一番風味~

思念的味道@ 印尼餐廳

印尼野係香港唔太受歡迎，可能因為其口味太濃，
但由於本人祖母是印尼華僑 ，自小就食到婆婆親手做既印尼食品，
炸蝦片，椰香咖哩雞，炒印尼花豆(又名臭豆)，千層糕...
呢Ｄ真係由細食到大!　

自婆婆回到天國，我家依然時不時一齊去食印尼野，
而以下呢間無論環境、餐具、食物、以致侍應伯伯，
都係我覺得最有風味又坐得舒服o既印尼餐廳!

己有三十年歷史的印尼餐廳，門口貼滿報訐雜誌訪問推介，
不過好唔好食都真係要親身品嚐先得！

因為訂左位，餐廳安排了特色卡座比我地，
個感覺真係好似置身於印尼咁, Good!



Order 左食物不久，就送來沙爹串燒豬~
串燒豬肉質夠鬆軟，烤得好香口, 配沙爹花生醬汁好野味,

另一款係地道印尼沙律﹣加多加多,　很脆口的蝦片、青瓜、芽菜,
再伴上沙爹甜醬汁, 香口得來甜甜地，未食過真係要試下啦！

我係薯仔狂，呢個牛肉薯餅當然要試!
炸過既薯餅香口非常，薯仔同牛肉比例係3:1
但薯味略厭不足，非必食之選。

十五夜﹣係印尼家鄉菜，主要是那瓜形切片糯米飯團LonTong，
再加上椰汁雞、巴東牛肉、酸辣豆腐、辣炸蛋、蝦片及雜菜等，

簡單說就是雜錦菜配飯團，LonTong口感煙韌豐富，
連醬汁同食真係一流！如果賣相好少少就更吸引了~

印尼香卷 - 類似腐皮卷，外層香脆, 內有豬肉馬蹄及糯米,
煙煙韌韌得來又香口, 有點咸，點Ｄ辣醬會野味Ｄ！

印尼脆炸雞﹣上台時仲熱辣辣，炸得皮脆肉香，
但食多兩件就覺得太膩了，一班人每人一兩件就夠！

最後的印尼炒飯及炒麵都不太滿意，
炒得不夠干身，但用料充足！

要補充，這裡的白飯與傳統印尼餐廳做法一樣，
侍應伯伯會拿著一大桶飯直接加上客人的碟上。

若初試者可叫這裡著名的「巴東牛肉」送飯,
另外必食推介的黃薑飯只有星期天供應。

... ... 

總括而言，每碟份量都唔少，一家五口食到飽一飽！
味道偏濃，各食品質量略有偏差，
賣相及服務雖不及新派印尼菜咁周到，
但勝在夠地道，夠隨和。

當日也見到一些印尼華僑食客到訪，
侍應伯伯用流利的印尼話與之閒談。

那一刻，讓我想起從前祖母教我說印尼話，
雖都忘了，但這一餐卻憶起了那思念的味道。

稻荷屋台拉麵

柯士甸路又新開左間北海道拉麵店，未入內店主便出來hard sell ，
說他們的拉麵是日本西山製麵特製再空運到港，

可惜我未去過北海道, 唔知北海道拉麵有幾好食，
o既然講到咁吸引，就即管試下！







店舖很窄，只能容納三張二人枱及一張四至六人枱，
當日眼見店內用膳範圍還有食材及店員的私人物品放置在當眼處，
難道那天是這店的首天開張日？

店主很熱心地講解他們的MENU, 主要有四款拉麵選擇如下圖：

他不停強調所有食材係日本直送，而且完汁完味無加味精！
又說正宗北海道拉麵是鹽味湯底，湯底較一般拉麵店清香，
如想香濃一點則可選味噌湯底，

聽完店主介紹，就選左昔風叉燒拉麵(味噌湯底）
及滿喫豆腐拉麵（鹽味湯底）

大約十分鐘後便送上第一碗味噌湯底叉燒拉麵,
賣相合格，溏心蛋看上也很對路，係片紫菜單薄左Ｄ...

急不及待試了一口湯底~ 果然較別的拉麵店清香一點，
感覺上果然係無落味精之作!

配料方面都好足，但筍無筍味，薄薄的叉燒又不夠香，無驚喜，
拉麵果然夠爽口彈牙，不錯不錯~

店主係呢個時候問左我地幾個問題：
「知唔知紅色呢Ｄ係咩黎？... 係辣椒絲呀!」

「咁知唔知點解本地多人做九洲拉麵？
因為北海道拉麵難煮Ｄ！Ｄ拉麵要用炸來處理...」

我地聽完簡直係呆左，呢Ｄ野唔講真係唔會知，
其拉麵雖爽口，可惜食完都唔太識分有咩特別之處

而且聽完店主講完咁多冷知識，其他果三碗麵都仲未到，
店主見我地眼望望，便解釋每次只能煮兩碗麵，
即叫即做，請耐心等候...

果然，order 左 廿分鐘後第二同三碗送到，
即試其鹽味湯底，比味噌湯底更清，又比中餐的清湯濃一點~

當中炸豆腐係最吸引，咬一口，外脆內滑，都幾香口，
食到最後，雖然炸豆腐夠香口，但都咪話幾油膩,
湯底也沒有令人想K.O. 晒o既感覺，

還有同事的第四碗拉麵足足等了30min，
時間控制方見面真係要努力改善，

明白店主很用心去做好呢間麵店，
但現實是殘酷的，我地食完並無再想食的感覺，

呢區咁多好野食，真係要祝店主好運了!

Lunch 就食 「一風堂」!!!

近期個個都話要食一風堂，可惜我就真係無耐性等，
剛巧聽到有人教路，只要平日12:30PM 之前去到，
就可以直入即食唔洗等！

我地更係唔可以放過呢個機會，
就來個Lunch 就食「一風堂」大行動!

果然，12:30 到達只係等左5分鐘安排入座，真係太正了！！

坐底後即拍環境照，眼見還有空位未入座！
但侍應生已忙過不停！

向waiter 查問赤丸及白丸有何分別，
侍應生也解釋得很詳細有禮！加分~
赤丸就是加上黑蒜油的濃味豬骨湯底，
而白丸就是清香的豬骨湯底，


最後決定選了赤丸加蛋，麵條選了硬的！

等左大約十分鐘我的赤丸便送到，
有兩塊半肥瘦豚肉，黑木耳，銀芽及蔥花
買相不算吸引，溏心蛋成隻浸左係Ｄ湯度未知生死....


也罷，即試飲一口湯底，
果然香濃豬骨味直達味蕾，然後是醬油和黑蒜味，也帶點微辣~
麵質是幼身的九洲拉麵，夠硬算爽口！

溏心蛋合格吧!蛋香又夠滑，可是十元是有點貴...

豚肉算是半肥瘦偏肥，肉香嫩滑，有入口即溶嘅感覺！

不消十分鐘便K.O. 左呢碗赤丸! 大滿足！

老實說，碗麵係合格有餘，
但相信因有太多香港人；包括我，
也到過日本食當地既拉麵，

總覺得還差一點什麼，卻說不出是何物，
而且離開餐廳不久，便感到口渴，

成個過程感覺好趕，環境雖然舒適但好嘈，
快快食完就要快快離開...
問心如果要等多過半小時都未必再來，

但味道，就是那樣容易讓人思念~，
呢碗麵，令我憶起「京都拉麵小路」的「宝屋拉麵」

無論其環境服務、食品賣相、材料麵條質數、

味道及價錢，至今也是十分的滿分！

唉...日本的拉麵也太令人懷念了吧~
也明白為何一風堂會在港瘋起來了~

「京都拉麵小路」的「宝屋拉麵」

「京都拉麵小路」的「宝屋拉麵」